TURA: Assam aro Meghalaya a·dokni simarango ong·enggipa golmalrangko namatna a·dok damgnini MoU-o soi ka·grikanichi Meghalaya a·dokni bewal songrangkon Assam a·doko man·angengani gimin ia jolrango songdongenggipa manderangni nangnikani gita a·dok damgnini soi ka·grikgipa MoU-ko nipiltaichina Association for Democracy & Empowerment (ADE), Meghalaya a·dokni Chief Minister Conrad K Sangma-na gisik ra·atpilaniko on·angtaiaha.
ADE-ni president Dalseng Bira Ch Momin-ni parakatani gitade, Meghalaya a·dokni bewal songrangko Assam-o man·angengani a·sel ia songrango donggipa manderang neng·nikanirangko man·tokengani gimin Assam sorkari baksa soi ka·grikgipa MoU-ko nipiltaichina uamang changni chang Meghalaya sorkariko didiatahachim indiba NGO-rangni dabianiko Meghalaya sorkari knachakna gisiko nangjaengachim.
“Ia songrango songdongenggipa manderang, chengonin Meghalaya a·dok ning·o songdongenggipa manderangan ong·e da·o uamangko Assam-o napataniara namen kragijani ong·enga. Iani bidingo chinga ia bilsini August 22 tariko Garo Hills aro Khasi Hills-ni dingtang dingtang NGO-rang baksa Shillong-o jinma jegale tom·bimonganiko ong·atangahachim. Uni ja·man chinga August 23 tariko sorkari baksa tom·e chanchirimon, Meghalaya a·dok ning·o ga·akgipa aro maming golmal grigipa dam 12 songrangko Meghalaya a·doko dongen ine ku·rachakaniko on·angahachim,” ine Momin parakataha.
Malangkona Joypur, Malangkona Huhuapara aro Malangkona Salbari songrangko Assam-o napatengani gimin janapatengon, ia songni manderangara chengonin Meghalaya a·dok ning·on songdongenggiparang ong·e, Meghalaya-ni Election Photo Identity Card (EPIC) donggiparang, Meghalaya a·dokon poraigiparang, Meghalaya sorkario kam ka·enggiparang ong·achim aro ia songrango Meghalaya a·dokni skul aro gipin office-rangba dongachim ine ADE-ni president parakataha.
“Ia songrangko Assam-o napatengani a·sel ia songni manderang ka·a be·tokenga indiba Meghalaya sorkari, ia manderangni duk mikchirangko knachakna gisiko nangjaenga. Ia bilsini October 10 tarikoba chinga KSU, FKJGP, AYWO, FAF aro uandakgipa dolrang baksa nangrime sorkarina gisik ra·attaianiko on·ahachim indiba da·alon sorkari, chingni dabianiko knachakna gisik nangjaenga,” ine Momin parakataha.
