SHILLONG: Meghalaya a·doko Bharatiya Janata Party (BJP)-ni anti-drug campaign-ko Sukrobar salo, East Shillong constituency-oni a·bachengataha.
BJP Meghalaya-ni state president Ernest Mawrie-ni u·iatani gitade, ia anti-drug campaign-ko a·bachengatanio campaign video-ko oprake on·angan baksana a·dok gimikna anti-drug team-ko songe on·angaha aro a·doko drugs ba pekatgipa sam jakkalaniko bon·atna gita dingtangmancha BJP-ni ming 8 proposal-koba oprake on·angjolaha.
A·doko drugs jakkalaniko bon·atna gita BJP-ni ra·baenggipa mingchet proposal-rangara, gipin a·dok sorkarirang baksa nangrime nirok sandiani, Northeast anti-drug squad-ko songani, Meghalaya-o Prosecution Directorate-ko songani, a·doko me·a aro me·chikrangna dingtang dingtang de-addiction centre-rangko kuliani, counselling centre-rangna tangka paisarangko dakchake on·ani, skul aro college-rango agan-ku·pattianirangko on·jringani, booth level-o anti-drug volunteer-rangko donatani aro sanna bananirangko am·enggipa manderangna indin dakchakanirangko on·anian ong·enga ine Mawrie parakataha.
Chadamberangko kal·susaanirango namdapatna gita ia anti-drug campaign-ni bak gita dingtangmancha sports club-rang jersey-rangkoba suale on·angjolaha.
Meghalaya a·doko drugs jakkalaniko champengna gita a·dok gimikon dingtang dingtang program-rangko ong·atanggen ineba BJP-ni state president parakataha.
Meghalaya a·doko lak 2.5-mangni gita drugs jakkalgipa manderang dongani gimin uan a·doko mande jelbra jelsuaoni 7.65 percent-ni gita ong·enga ine talataniko on·angengon, ia anti-drug campaign-ko BJP, da·o election-osan ong·aigija election-ni ja·manoba ong·atangkugen ine Mawrie parakataha.
“Meghalaya a·doko 30 percent-ni gita chadamberang pekatgipa samrangko jakkale neng·nikanirangko chagrongna nangtokenga aro chinga an·chingni Home Minister Amit Shah-ni drugs jakkalaniko bon·atna nangnikenganiko chu·sokatna gita rakbee kamrangko ka·gen,” ine Mawrie parakataha.
A·doko drugs jakkalaniko jegalna gita re·baenggipa January 7 tariko, West Shillong constituency-o jinma tom·e re·jomaniko ong·atanggen aro ia re·jomaniko Mahila Morcha dilanggen ineba BJP-ni state president parakataha.
