SHILLONG: China neng·nikanirangko man·enggipa biaprangna ma·mong sorkarini ra·gatgipa Jal Jeevan Mission (JJM)-ni ning·o census town-rangkoba man·chapatengani gimin National People’s Party (NPP) aro Bharatiya Janata Party (BJP) dolrangni gisepo adita jegrikani ong·kataha.
China neng·nikanirangko man·enggipa pilak census town-rangkoba JJM-ni ning·o chapatna gita Meghalaya a·doko NPP-chi dilenggipa sorkarisa ja·kuko de·chengaha ine adita salrangna skang Mawpat Water Supply Scheme-ko bariatna gita pangchakaniko songe on·angani somoio a·dokni Chief Minister aro NPP-ni national president Conrad K Sangma aganahachim indiba uni agananiko BJP jegalatskaaha.
“JJM-ni kamrangko ta·rake matchotatchina @jjmmeghalaya-ko didienga. Jal Jeevan Mission-ni ning·o Mawpat Water Supply Scheme-ko gong kror 28.08 koroschi bariatna pangchakaniko songaha aro ian jolo donggipa te 1922 nokdangrangna chu·onga gita chirangko on·e manderangna namgni ong·gnok,” ine Sangma, social media-o parakatahachim.
Indake ong·engon, uni iandakgipa kattarangna BJP-ni dilgipa aro Pynthorumkhrah-ni MLA AL Hek, an·tangni suk ong·gijaniko parakatskaenba, dilgiparangni iandakgipa kattarangko bebera·jachina jolni manderangko didiatskaaha.
Pynthorumkhrah constituency-ko Election Commission, rural constituency ine u·iataha aro ia constituency-ni manderangba rural constituency-o jeko man·enga pilakkon man·na nanga ine Hek aganaha.
“Na·simang a·kangna aro tol·e ku·rchakanirangko dakna man·aia indiba kakketde kakketan ong·aigen,” ine ua aganaha.
BJP MLA-ni parakatani gitade, 2013 bilsio constituency-rangko sualpiltaiani ja·man Pynthorumkhrah constituency-koba rural constituency-ni parakahachim aro JJM-ko 2019 bilsini August 15 tariko a·songni Prime Minister Narendra Modi, Red Fort-oni a·bachengatahachim.
JJM-ara songadam nokadamrango donggipa nokdang ge·antinan chirangko sokate on·na ma·mong sorkarini ra·gatgipa scheme ong·a aro Pynthorumkhrah constituency-ba rural constituency ong·ani gimin ia scheme-ko man·na nanggipa ong·a ine Hek parakataha.
