SHILLONG: Meghalaya a·dokni sakbri gitcham MLA-rang, United Democratic Party (UDP)-o napangaha. UDP-o napna skang ia sakbri MLA-rang, Assembly-o membor ong·aniko watangchengaha aro ja·mano UDP-ni office-o dingtangmancha program-ko ong·atanio UDP-o napangaha.
Ia sakbri gitcham MLA-rangko, UDP-ni president Metbah Lyngdoh aro gipin dilgiparang dolona rimchaksoaha.
UDP-o napanggipa sakbri gitcham MLA-rangara, Congress doloniko ra·gala man·gipa Nongpoh-ni gitcham MLA Mayralborn Syiem, Sutnga-Saipung-ni gitcham Trinamool Congress (TMC) MLA Shitlang Pale, Mawkyrwat-ni gitcham HSPDP MLA aro Cabinet Minister Renikton L Tongkhar aro Nongkrem-ni gitcham Independent MLA Lambor Malngiang ong·a.
Koborko on·ani gitade, kamtangko watanggipa Mawlai-ni gitcham MLA Process T Sawkmie-ba ja·mano UDP-o napanggen.
Ia sakbonga gitcham MLA-rang, re·baenggipa February jao ong·atenggipa Assembly election-o UDP-oni susagen ineba ia tom·anio UDP-ni president parakataha.
