TURA: Meghalaya a·dokni gitcham chief minister Salseng C Marak-ni depante aro Congress dolni gitcham MDC Silman K Sangma, Bristibar salo National People’s Party (NPP)-o napangskaaha.
NPP-o napanggipa Silman K Sangma, Rongrong constituency-ni gitcham Congress MDC ong·achim aro uni NPP-o napangani somoio uko Williamnagar-ni NPP MLA Marcuise N Marak aro Mendipathar-ni MLA Marthon J Sangma rimchaksoaha.
Koborko on·ani gitade, ia Assembly election-o Silman Sangma, Resubelpara constituency-o Congress tikitchi susana dorgastoko galahachim indiba Congress tikitko gipin candidate-nasa on·skaengani gimin suk ong·jae ua NPP-o napangskaaha.
Resubelpara constituency-na NPP-ni tikitko Assembly-ni deputy speaker aro Resubelpara-ni MLA Timothy D Shira-na on·manskaahachim indiba Silman-ni NPP-o napanganiara ia election-o NPP-ko bilakbatatani gita ong·gnok ine kobor on·timgiparang parakataha.
