SHILLONG: A·doko koela choanina kraa ja·kurangko ga·na man·jae chu·sokgijanina Sonibar salo Opposition dol TMC, MDA sorkariko rikenggipa NPP dolko matnangataha.
“Lekka puonani changantion ku·rachakmangmangasan ong·aia indiba sorkari uamangko tangdoatna kamrangko ka·ja. Ia a·ani nokgiparang ba a·ani depanterang jemangan man·e cha·na nangachim ia sorkarini ning·o neng·nikanirangko man·engaha,” ine West Khasi Hills-ni Mawshynrut-o election rally ong·atani somoio Opposition dolni dilgipa Dr. Mukul Sangma aganangaha.
“2018 bilsio maiko aganahachim na·simang gisik ra·atjama? Sorkariko a·bachengaton ja 6-ni gisepon uamang koela-ko chona man·anggen ine uamang aganjachimma? Uni gimin da·alo an·chinga NPP sorkarini tangka cha·aniko bichal ka·anggen,” ine ua gisik ra·ataie aganangaha.
Damgipin Phulbari-o election rally ong·ani somoio, Opposition dolni dilgipa sorkariko rikangna ka·donge aganangaha aro chadamberangna chasongna kamrangko on·angna party-ni mongsonggipa miksonganirangko list ka·e parakataha.
“Bilsi 5-ni gisepo maming namdapanirangko nikjae gisik sadikaniko man·a. Ia biaprango namroroanirangko nangchongmotenga. An·chingni bi·sarang saknaniko man·engaha. Ku·cholsan ong·na ian somoi ong·engaha aro TMC-ko bilona ra·baenganichi dingtanganiko ra·bana,” ine ua aganangaha.
Meghalaya a·dokni manderangni a·arangko Assam a·dokna on·atanina Mukul, MDA sorakriko ning·tuen matnangataha.
“MDA sorkari maidake Assam a·dokna a·ako on·ata angan sakki ong·enga. Ian somoi ong·engaha da·o an·chingni a·atangko naljokatna nangengaha. Skanggipa aro bon·kamgipa, an·ching ia gipinni bilchi rikgipa sorkariko ra·galchengna nangengaha jedakode an·ching re·mikkangna aro an·chingni neng·nikanirangko namatna,” TMC-na vote-ko on·angna manderangko Sangma mol·molangaha.
East Garo Hills-ni Rongjeng-o ge-gipin mande jinma tom·aniko Opposition dolni dilgipa ong·ataha.
