SHILLONG: Re·anggipa Mongolbar walo, Phulbari constituency-ni ning·o dolgni dinggrikanichi re·baenggipa February-ni 27 tariko ong·atenggipa Meghalaya Assembly election-na maming nangchakeani dongjachina gita Budbar salo National People’s Party (NPP), district administration-ko didiatenba, West Bengal a·doko ong·ronga gita Meghalaya a·dokode so·sojengjeng ong·gipa election-ko ong·atna on·jachina didiataha.
Meghalaya Assembly-ni gitcham speaker aro Phulbari constituency-ni NPP candidate AT Mondal-ni parakatani gitade, Mongolbar walo ong·anggipa a·selara badiaba dolni miksongmanchae ong·atgipa a·selsa ong·achim.
“Meghalaya a·dokosan ong·aigija India a·song gimikon maming so·sojengjeng ong·ani gri election-ko ong·atna nanga. Chinga so·sojengjeng ong·ani gri ong·gipa election-kosa nangnika indiba ian badiaba dolni miksongmanchae dakanisa ong·aha,” ine Mondal parakataha.
Ia a·sel ong·anio NPP-ni manderangde tom·tomesa re·jomangengachim indiba TMC-ni manderangsa uamangko chadrapchengaha ine janapatengon, ia a·sel ong·aniko da·o social media-rangode bikpilesa mesokna jotton ka·skaengaha ine NPP-ni candidate parakataha.
Ia a·sel ong·anio NPP-na kam ka·enggipa manderang saknaanirangko man·tokaha aro sakgnide bilongen saknaanirangko man·ahani gimin Goalpara hospital-o donatako man·aha ineba Mondal parakataha.
Ia a·sel ong·anina NPP-ni ku·wattimgipa aro gitcham MLA Ampareen Lyngdoh-ba suk ong·gijaniko parakataha aro mikkangchi iandakgipa a·selrang ong·taijana gita mikrakbate kamko ka·china district administration-ko didiataha.
