SHILLONG: A·doko cha·boke cha·anirangko bon·atgen ine ku·rachakgipa kattarangko uamangni Vision Document 2023 ba menifesto-o BJP-ni janapenba parakatani adita kontarangni ja·manon saffron party-ni ku·rachakaniara tol·pinnikanisan jemangan MDA-o bakrimgiparangoni dolsa ong·pagenchimoba, MDA-o cha·boke cha·anirangni bidingo jripjrip dongaia ine AICC-ni ku·wattimgipa Supriya Shrinate matnange aganaha.
Saksa retired Supreme Court Judge-ko skotong dake donenba dolsa Special Task Force-ko songemingna cha·boke cha·anirangko sandiatgen ine BJP-ni ku·rachakaniara ong·gramaigipasan, maina uamangba MDA-ni bak-rengsian ong·a ineba AICC-ni ku·wattimgipa koborni manderangna aganaha.
Batanggimin bilsi bongana MDA sorkari baksa bakrimiting somoio BJP maiko dakahachim ukoba ua sikenba sing·doaha.
BJP, Meghalayao seat ge·sakoba chejawa ine aganengon, Special Task Force-ko songgen ine uamangni agananiara chonchongipa party-rangko ka·mikkenatna dakasan ong·aia, maina BJP uamangkosa mikron bu·aigen ine Shrinate aganaha.
Cha·boke cha·anian gapgipa MDA sorkario bak dongpagipa party-tangni dilgipa sakgni Sanbor Shullai aro AL Hek-ni kosako BJP ja·ku de·genma ine sing·on, ua aganaha je, “Saffron party, Meghalayani manderangni chong·mot ong·aniko gimaatanina kenchakaniko ra·bagipa ong·a, maina Indiani dingtang dingtang biaprango giljarangko chadrapenga aro matchu be·en cha·a potenba dosgrirangko doktimole siatenga.”
“Assamo Kristian-rangko aro Muslim-rangko chadrapenga,” ine jaksi ote aganengon, Assamo RSS-ni dakchakako man·gipa Hindu organisation, Kristian-rangko Scheduled Tribe status-oniko ra·galchina gita dabiaha ine AICC dilgipa aganaha.
BJP, a·song gimikon jatrangko bobil ong·grikatenga aro jatsa jatgipinni kosako mitchigrikataniko ra·baenga aroba BJP, mingsa Uniform Civil Code-koba ra·gatna ja·ku de·enga.
“Tribal-rangni namgnina kam ka·gipa Fr. Stan Swamy-ko BJP-ni rim·enba doke-sate siatani obostarang da·oba chingni gisikrango cha·sukuenga, chinga uko pangna gisik ra·gen,’’ Shrinate aganaha.
Cha·bokaniko bon·atna BJP-ni ku·chakaniara tol·pinnikanisan: AICC
Date:
Share post:
