District council-rangna chamgipa tangkarangko NPP sorkari jakkalsreta: Mukul

SHILLONG: District Council-rangna chamgipa tangka paisarangko National People’s Party (NPP)-chi dilgipa MDA sorkari jakkalsretaha ine Bristibar salo, Trinamool Congress (TMC)-ni dilgipa Dr Mukul Sangma matnangataha.
“District council election-na campaign ka·engmiting somoirango anga chadamberangko mikrake dongchina aganahachim. District council-ni nanganirangko NPP-chi dilgipa MDA sorkari knachakahama? Ia sorkarini nisie galanggipa District council-ni mikkim rasongko an·ching ra·bapilna nangenga. District council-o kam ka·giparang ja 30 batpile dormaharangko man·tokkujaenga aro ia tangka cha·rakgipa sorkari, uamangni dormaharangko on·kujaenga. MDC-rangba 2019 bilsionin jasanikoba an·tangtangni dormaharangko man·tokkujaenga. Ia sorkarian tangka paisa gimikkon jakkalsretaha,” ine Sangma aganaha.
West Garo Hills a·jani Dadenggre constituency-o hajal kotok manderangna aganprakangengon, Assam-na gimaatgipa a·arangko man·pilna gita TMC, miksonganirang donga ine Sangma parakataha.
“Angni chief minister ong·engmiting somoio, an·chingni a·arangko Assam-o man·angengani gimin chinga songgigrikanio soi ka·na jechakaha indiba ia NPP-chi dilgipa sorkari, Assam baksa songgigrikanio soi ka·e an·chingni gamchatbegipa a·arangko pale cha·aha,” ine ua aganaha.
BJP-ni ka·namjabegipa miksonganirangoni chel·e dongchina gita Dadenggre-ni manderangko mikrakatengon, “BJP sorkarini gipin a·dokrango ra·gatgipa ka·namgijagipa niamrang an·chingni nitobegipaa Meghalaya a·dokonaba sokbana siengani gimin an·chingni a·dokna namen kenchakna nangani ong·engaha,” ine TMC-ni dilgipa parakataha.
“India a·songko namroro silrorogipa a·song ong·atna an·ching pilakan ku·cholsan ong·ahachim. Jammu & Kashmir a·dokni manderang, uamang an·tangtangni a·arangni nokgiparang ong·gen ine ku·rachakahachim. An·chingna on·gipa Sixth Schedule gita apsan dakanggipa Article 370-ko Jammu & Kashmir-na aro Article 371-ko Nagaland-na on·aha. Jatni daka rikani aro janggi tangani bewalko chel·chakna aro ripinge rakkina gitasa ia niamrangko on·ahachim indiba Kashmir-o Article 370-na mai ong·aha? Article 370-ko Delhi-o asongenggipa ma·mong sorkari, an·tangtangni man·gnina ra·galpilaha. Modi-chi dilenggipa BJP sorkari, manderangni kosakosa kamko ka·ronga aro uandaken Kashmir-o gitcham chief minister-rangko man·chape bang·a dilgiparangko rim·aha. Uni giminsa an·ching iandakgipa sasonni ning·o ong·jana gita ku·cholsan mikrake dongna nangenga,” ine Sangma aganaha.