TURA: Sonibar walo, election-ni kamko ka·na gita West Garo Hills a·jani Tikrikilla jolona re·angenggipa chadambe official saksa, uni gari a·sel ong·ani ja·man siangna gita nangaha.
Tura Chandmari-ni bilsi 30 ong·gipa Chesan Ch Marak, Gambegre block-o MGNREGA-ni technical assistant ong·e kamko ka·engachim aro ia Assembly election-o ua Tikrikilla constituency-ni Jangrapara polling station-o second polling officer-ni kamna donatako man·e Sonibar attamon, an·tangni polling station-ona an·tangni dol baksa re·chakatangahachim.
Tura-oni re·chakatangani ja·man Potamati songona sokon ia gari bikpile a·sel ong·aha aro a·sel ong·anio Chesan baksana gipinrangba saknaanirangko man·tokaha.
Gari a·sel ong·ani bidingo koborko man·soa bakan a·jani official-rang ua biapona re·ange, saknaa man·gipa manderangko sepangbatgipa hospital-ona ra·angaha.
Indake ong·genchimoba, Chesan-kode uni skorango bilongbee mata bu·anirangko man·ahani gimin uko nambate sanna banna man·na gita Guwahati-ona ra·angengachim indiba ua Robibar pringon janggi galaiaha.
Koborko on·ani gitade, ia dol baksa re·angenggipa BSF sipai sakgni aro Home Guard sipai saksaba adita saknaanirangko man·aha.
A·sel ong·ani ja·mano Zonal Magistrate, ua biapona re·ange uamangni ra·angenggipa EVM aro VVPAT machine-rangko ja·man gipin dol baksa Jangrapara polling station-ona ra·angaha.
Kobor on·timgiparangni u·iatani gitade, election-ni kamko ka·na re·angenggipa bang·bata dolrangnan Mahindra pik-up garikosa on·ahachim aro sianggipa Chesan Marak aro uni dolnaba Mahindra Pik-up garikosa on·ahachim. Ia gariko salangenggipa mande agre ta·rakdugae salahani a·selsa garini ta·rakaniko amchakjae ia gari bikpileke a·sel ong·aha aro ia gari a·sel ong·ani ja·man garini driver-de ua biaponi kataha ineba kobor on·timgiparang u·iataha.
