SHILLONG: Bristibar salo, Shella Assembly constituency-o vote-rangko chanengmiting somoio NPP-na chakenggipa manderang ma·sisretani a·sel Sohra-o donggipa counting centre-o adita so·sojengjeng ong·anirangko nikna man·aha.
Kobor on·timgipa manderangni u·iatani gitade, Shella constituency-o vote-rangko chanengmiting somoio channa matchotgijaan badiaba news channel-o NPP-ni candidate-ko cheaha ine parakataha indiba ja·mano vote-rangko chanmanahaon, NPP-ni candidate Grace Mary Kharpuri-ko United Democratic Party (UDP)-ni candidate Balajied Kupar Synrem cheahani gimin NPP-ni manderang, vote-rangko chanpiltaichina dabitokaha.
Indake ong·genchimoba, vote-rangko channanio maming gualani dongja ine vote-rangko chanpiltaina jechakon, NPP-na chakenggipa manderang, Sohra-ni counting centre-ko ro·ongrangchi gona a·bachengtokaha.
Iandake so·sojengjeng ong·na a·bachengmiting somoio bakan police-rang, chirangko sate manderangko ua biaponi katatna man·aha.
Ja·mano, ia biapo Section 144 CrPC-ko ra·gatangaha aro NPP-ni candidate Grace Mary Kharpuri an·tangba, an·tangni manderangko tom·tomchina didiataha ine kobor on·timgiparang parakataha.
Shella constituency-o UDP-ni Balajied Kupar Synrem, NPP-ni Grace Mary Kharpuri-ko 434 vote-rangchi cheangahachim.
