SHILLONG: Meghalaya a·doko National People’s Party (NPP)-ni dilanichi gital sorkariko rikna tariahaon, a·dokni manderangna nambate dangdike on·na miksonganiosa ua apsan bakrime kamko ka·na gita United Democratic Party (UDP) aro People’s Democratic Front (PDF) dolrangkoba okamataha ine Sombar salo NPP-ni national president aro a·dokni Chief Minister-na seokako man·taigipa Conrad K Sangma parakataha.
NPP-ni sak 26 MLA-rang baksana BJP, HSPDP aro Independent MLA-rangko channe sak 32 MLA-rang dongeba maini gimin UDP aro PDF dolrangko nangdapaha ine sing·anina aganchakaniko on·angengon, NPP-o chu·onga gita MLA-rang dongaiani giminde ua chu·ongnikja indiba uni bebera·ani gita ku·cholsan bakrime kamko ka·na gitasa bakrimaniko nangnikaha ine Sangma parakataha.
NPP-chi dilenggipa sorkario bakrimna gita ua an·tangsa UDP aro PDF dolrangkoba okamataha ine talataniko on·angengon, batanggimin bilsirangoba uamang pilak duk sukni somoirango apsan kamko ka·rimahani gimin pilakkon ia somoioba apsan ong·taianiko ua nangnikaha ine Sangma parakataha.
BJP aro NPP-ko gale, TMC aro Congress dolrangni bakrimanichi a·joltangni political dolrang, sorkariko rikna jotton ka·ahaoba Robibar attamo, UDP aro PDF dolrangde NPP-chi dilenggipa sorkario bakrimna re·baskaahachim ine nikna man·a.
Election-ni somoirango dolsa dolgipin baksa bang·en matnanggrikanirangko dakaha ine janapatengon, da·o ian gital dake nama chanchianio a·bachengpiltaiani somoi ong·aha aro gitcham somoirangkode uamang gualaha ine NPP-ni national president parakataha.
Ia gital sorkari, a·doko matchotgija dongenggipa bang·a kamrangkon ia bilsi bongani gisepo matchotatna jotton ka·gen ineba gital CM-na seokako man·gipa Conrad Sangma parakataha.
