SHILLONG: 2016-17 bilsirangonin Tetelia-oni Byrnihat-ona taribaenggipa rel project bon·chipengani gimin ia rel project-ko tangatpiltaina gita Northeast Frontier Railway (NFR)-ni official-rang, Meghalaya a·dokni Chief Minister Conrad K Sangma-ko gronge agangriktainaba gnang.
Batanggimin bilsirangoba ia project-ko a·bachengatpiltaina gita NFR-ni official-rang, baditaba chang a·dok sorkariko gronge agangrikahachim indiba a·dokona rel gari ra·napbaaniko dingtang dingtang dolrang jegaltokengani a·sel ia project chu·sokgipa ong·na man·chipkujaengachim.
NFR official saksani parakatani gitade, Assam a·dokchipaknide ia Tetelia-Byrnihat rel project-ni kamrang matchotna sipilengahachim aro da·o Meghalaya a·dokchipakkoba ia kamrangko a·bachengpiltaina Meghalaya sorkari on·genchimoba Byrnihat-o railway station-ko rikna komibeoba bilsignikode nangkuaigenchim.
Meghalaya a·dokona aro mongsongbate Khasi Hills a·jarangona rel garirangko ra·napbana skang, niam gri napsrukanirangko champengna gita Inner Line Permit (ILP)-ko ra·gatchengchina NGO-rang, niamko donskaahachim.
Niam gri napsrukanirangko champengsona gita rakgipa niamrangko ra·gatchengchina a·dokni dingtang dingtang dolrang dabitokengachim.
Shillong songjinmana agrede, salgro salaram jolo donggipa pilak a·dokni skotong songjinmarangan rel ramarangchi nangdimeatako man·aha indiba a·doko dingtang dingtang dolrang rel garirangko jegalsotokengani a·selan Shillong songjinmaonade rel garirangko ra·bana man·kujaenga.
Indake ong·genchimoba, Meghalaya a·doko songdongenggipa Khasi jatrangna Inner Line Permit ba Article 371 (A) (Special provision with respect to the State of Nagaland) ba 371 (G) (Special provision with respect to the State of Mizoram) gita dakgipa niamrangko ra·gatna ma·mong sorkari ku·rachakaniko on·genchimode rel project-rangni gimin agangrikna kusi ong·aigen ine KSU parakatskaahachim.
