SHILLONG: Bihar a·doko Meghalaya a·dokni sakgni Kristian dilgiparangko chadrapa ine jangbingbangenggipani bidingo a·dokni Deputy Chief Minister Prestone Tynsong, talataniko on·angenba, Bihar a·dokni Patna songjinmao Meghalaya a·dokni sakgni Kristian dilgiparangko Bajrang Dal membor-rangni rim·gipa video-ko watpriprae ding·chaoataniko ra·bajachina mol·molataha.
Ia a·selni bidingo talataniko on·angengon, Bihar a·doko Meghalaya a·dokni Kristian dilgiparangko maming chadrapa dongja aro dolgnini gisepo adita jegrikanisan ong·kataiachim ine Tynsong parakataha.
Meghalaya a·dokni Kristian dilgiparang da·o maming a·sel ong·a grian a·dokona re·bapilengaha ine talataniko on·angengon, dolgnini gisepo maming ding·chaogrikanirang dongjana gita ia video-ko watpriprajachina aro ia a·selni bidingo tol·e jangbingbangatjachina a·dokni Deputy Chief Minister, a·doko songdongenggipa manderangko mol·molataha.
Ia a·selni bidingo Meghalaya sorkari ta·raken ja·kuko de·aha aro a·dokni sakgni Kristian dilgiparangko tom·tomao sokbapilatna gita police-rangba, Bihar-ni police-rang baksa agangrikaha ineba Tynsong parakataha.
Tynsong-ni parakatani gitade, a·dokni sakgni Kristian dilgiparang, Bihar a·dokoni re·chakatbaahani gimin Mongolbar attamon Guwahati-ona sokgen ine ka·dongsoenga.
