AMPATI: Mongolbar salo, South West Garo Hills a·jani District Health Society-ni gita Youth Festival-ko Chengkompara AFHC kal·chakramo ong·atangaha aro ia youth fest-ko ong·atanio chadamberangna kal·susaani, git ring·susaani, chroksusaani aro poster sesusaanirangkoba ong·atangaha.
Ia youth fest-ko Rashtriya Kishor Swasthya Karyakram (RKSK)-ni ning·o ong·atangaha aro ia program-ko ong·atanio Shillong-o donggipa Directorate of Health Services-ni Joint Director Dr L Marak, mongsonggipa sokgipa ong·e chadamberangna aganprakangengon, be·enni aro gisikni gita an·seng baljoke dongna nangani gimin aganangaha.
Mikkangchi a·songko dilgiparang ong·china gita chadamberangko didiangengon, bilsi sokgija an·o dongani aro pekgipa bosturangoni chel·e dongchina gita Dr Marak, chadamberangko didiangenba, janggi tanganio chu·sokgiparang ong·na be·en aro gisikni gita pangnan an·seng baljoke dongchina ku·pattianiko on·angaha.
Ia program-ko ong·atanio dongpae, chadamberangna agan-ku·pattianirangko on·anggipa gipin manderangara, District School & Education Officer T Ch Marak, RKSK Program-ni District Nodal Officer Dr Noreen Sangma, District Tuberculosis Officer Dr Mikrak Sangma, SDM&HO Dr S Hajong aro District Leprosy Officer Dr Lydia Sangma ong·a.
