SHILLONG: Voice of the People’s Party (VPP)-ko Election Commission of India (ECI), state political party ine ra·chakahaoba United Democratic Party (UDP)-nade maming kenchakna nangani dongjawa maina a·dokni manderang da·oba UDP-kon mongsongbatgipa regional party dake ra·engkua ine Budbar salo UDP-ni president Metbah Lyngdoh parakataha.
“VPP-de gital political dolsan ong·aia aro a·dokni manderang UDP-kon mongsonggipa regional party dake nidokuenga. Chinga VPP-ko mikkangpana aro warachakna ka·dongaia,” ine Lyngdoh, VPP-ni a·doko bilakgipa political dol ong·e mesokna jotton ka·enggipani bidingo sing·anina aganchakaha.
Political dolrangde nakate bon·angrongaia ine janapatengon, UDP dolde bang·a neng·nikanirangko chagrongbagimin gitcham political dolsa ong·a ine UDP-ni president parakataha.
“Ia bilsini Assembly election-o chinga sakdok-oni sak 11 MLA-rangko ong·katatna man·aha aro ian manderangni UDP-o ka·donganiko mesokani ong·a,” ine Lyngdoh aganaha.
UDP-ni MLA sakgni, chong·motan Paul Lyngdoh aro Kyrmen Shylla, Chief Minister Conrad K Sangma-chi dilenggipa Cabinet-o minister ong·angkugen ineba UDP-ni president parakataha.
“Da·o dipet chinga Cabinet-ni biapko sualgrike on·ani gimin chanchirima dongkuja indiba ia pilakan obostani krisa ong·aigen aro iani bidingo anga mamingkoba agandapna man·jawa. Politics-ode mamingan dongkamnagipa ong·ja,” ine Lyngdoh aganaha.
