SHILLONG: Meghalaya a·doko lekka porani gadangko tang·doatna gita a·dok sorkari, secondary skulni gadango Mathematics subject-ko compulsory ong·atna miksonganirang dongenga aro ia miksonganiko ra·chakahaode Secondary School Leaving Certificate (SSLC) porikkao Mathematics subject, optional ba basee sena man·gipa subject ong·jawaha.
Meghalaya a·dokni Education Minister Rakkam A Sangma-ni parakatani gitade, a·doko Mathematics aro Science skigiparang chu·ongjani giminsa ia subject-rangko basena man·gipa subject-rang gita donahachim indiba sorkari da·o ia subject-rangko compulsory ba ra·telna nanggipa subject-rang ong·atpilna nangnikengaha.
“Angni nikani gitade, an·chingni a·dokoba iako dingtangatna nangani ong·engaha. Iani bidingo chinga chanchiangkugen indiba Mathematics subject gri chubata gadangrango poraianirangara chatro chatrirangna maming namgnirang dongjaengani gimin Mathematics subject-ko compulsory dakna nanggnok,” ine Sangma aganaha.
A·doko lekka porani gadangko dingtangatna sorkari kang·kare kaenga ine janapatengon, a·dokni chatro chatrirang, mikkangchina an·tangtangko tarisamsoengon, u·iani aro ka·dongbatatanirangkoba nangchongmotenga ine Education Minister parakataha.
Education Minister-ni aganani gitade, a·dokni chatro chatrirangba gipin a·dokrang gitan apsan lekka porani aro u·ianirang baksa dal·rorona man·na gita sorkari, MBOSE syllabus-koba CBSE baksa apsan ong·atna miksongenga.
Sorkari skulrangni obostarang namsrangjaengani gimin sing·on, a·dokni dam 117 LP skul nokrangko taridapna gita sorkari bakan tender-ko on·gnok ine Sangma parakataha.
Sorkari skulrangko namdapatani gimin janapatengon, constituency-tangtango donggipa mitam skulrangko an·tangtangan deragatchina ba an·tangtangni MLA scheme-rangoniko chame skul nokrangko taridapchina gita Education Minister mol·molataha.
