SHILLONG: Roster system-ni bidingo jinma chanchirimna aro jinmana talataniko on·na gita a·bachengo tik ka·sogimin gitan Voice of the People’s Party (VPP)-ni gnigipa jinma tom·bimonganiko Budbar salo, Jowai-ni Iawmusiang-o ong·atangaha aro ia tom·aniko VPP-ni president Ardent Miller Basiawmoit an·tangan dilangaha.
Ia tom·bimonganio VPP-ni president aro Nongkrem constituency-ni MLA Basaiawmoit, jinmana aganprakatengon, uamang roster system-ko jegalenga ong·ja indiba 1972 bilsio ra·gatgipa state reservation policy-ara Khasi aro Jaintia Hills a·jani chadamberangnade bak rengsiko nanga gita tikatjaengani giminsa gital dake nipiltaianiko nangnikenga ine parakataha.
A·dokni Job Reservation Policy-ko name nipiltaikujaskal, pilak department-rangon gital kamo ra·aniko dontongchengkuchina gitaba ua ia tom·anio dabiangtaiaha.
Roster system-ni bidingo chanchirimna gita Assembly-ni special session-ko ong·atchina VPP dabiahachim indiba ia dabianiko sorkari jegalaha ineba Basaiawmoit, ia tom·anio jinmana parakataha.
Reservation policy-ko nipiltaichina aro iana dingtangmancha committee-ko songchina uamang bilaken dabiangkugen ineba VPP-ni president aganaha.
Reservation policy aro roster system-ni bidingo Khasi aro Jaintia Hills-ni gimik sak 36 MLA-rangko apsan ku·cholsan ong·e ku·rang on·china didiangengon, ia kamo Khasi aro Jaintia jong ada no-abirang pilakan apsan nangrime kamko ka·genchimode ian mikkangchi Khasi aro Jaintiarangna namgni ong·gen ineba Basaiawmoit parakataha.
Ia tom·aniko ong·atanio Jowai-ni saksa dilgipa OR Challam-ba Roster system-ni gimin adita aganangaha.
Ia apsan dakgipa tom·bimonganiko da·al Bristibar salni bako VPP, Jaiaw-o ong·atna tik ka·soaha.
