SHILLONG: A·doko load shedding ba bijiloko den·ani gimin a·dokni manderang neng·nikako man·tokengani gimin, ia mamlao kam ka·enga ine Deputy Chief Minister Prestone Tynsong aganataha.
Kobor ra·timgiparang baksa agangrikmitingo Prestone Tynsong, a·doko ru·uta konta somoina bijoliko den·aniara beben manderangna neng·nikani ong·enga ine ra·chake, NEEPCO-ni ge·gni-ge·gittam unit-rang kam ka·jaengani a·sel iandakgipa obostako chagrongna nangenga ine talataha.
“Neng·nikgenchimoba mikkangchi iandakgipa obostako chagrongangkuna nangkuaigen ine janapate, Chief Minister-ni adita salrang skang Power department-ni official-rangko gronge agangrikani gimin parakangaha.”
Minggipin a·doko mikka waa dongjani a·sel a·dokni generating unit-rangba kam ka·jaenga, iarangni giminba a·doko bijolini gimin neng·nikako chagrongangkugen.
Meghalaya Energy Corporation Limited (MeECL)-ni Managing Director Sanjay Goyal, ta·raken load shedding-ni somoirang bakkandiknaba donga ine ka·donganiko parakataha.
A·doko, bijolini demand ba nangnika 250 MW-ona sokengjok indiba man·aniara 170 MW-san ong·a, ian a·dokni generation-oni ong·a aro central generating unit- NEEPCO, NTPC aro Agartala-ni power plant-oni ong·a.
