SHILLONG: Bristibar salo, Meghalaya a·dok gimiko sak 10 manderang COVID-19-ko man·dapaha aro ia sak 10-oni sak 8-de West Garo Hills a·jao ong·a.
Batanggimin adita sal somoirangonin West Garo Hills a·jao COVID-19-ko man·giparang batengachim ine nikna man·a.
Bristibar salo sak 10 manderang COVID-19 man·dapahani gimin da·o a·dok gimiko COVID man·e dongenggiparang sak 26 gapengaha aro ia sak 26-oni sak 15-de West Garo Hills-o, sak 8-de East Khasi Hills-o, sak 1-de South Garo Hills-o, sak 1-de South West Khasi Hills-o aro sak 1-de West Jaintia Hills a·jao ong·enga.
Meghalaya a·doko COVID man·e dongenggipa sak 26-oni sak 3-kode hospital-rango donna nangenga.
Da·o dipet a·dok sorkari, manderangna niamrangko ra·gatna miksonganirang dongkuja indiba a·doko songdongenggipa mande sakantian, COVID-ni niamrangko ja·rikna nanga ine adita salrangna skangsan a·dokni Health Minister Ampareen Lyngdoh didiatahachim.
Ia sal somoirango manderang mask-rangko gantokjaengahani gimin jinmani biaprango ong·engon, mask-rangko ganjringchina aro saksa sakgipinoni chel·tanggrike dongchina gitaba Health Minister ku·pattiataha.
