Ganesh Das Hospital-o ong·gipa obostani bidingo inquiry-ko a·bachengata

SHILLONG: Adita salrangna skang, Shillong songjinmani Ganesh Das Hospital-o me·chik saksako an·pakna gita caesarian dakanio me·chikni oko biji bajirikani gimin NEIGRIHMS-ona ra·angskana nanggipa obostako Health Services-ni Director (Medical Institution)-ni gadango inquiry dakna a·bachengataha ine Bristibar salo, a·dokni Health Minister Ampareen Lyngdoh parakataha.
Iani bidingo kobor ra·timgiparangna talataniko on·angengon, Ri Bhoi a·jao donggipa Mawlyndep songoni Fatima Rani minggipa me·chikko sannanio, hospital-o kam ka·enggipa manderang maiba dakgualani dongama dongja uko ma·sina gita DHS (MI)-ni gadango inquiry-ko dakchina ua didiaha ine Lyngdoh parakataha.
“Manderang hospital-rango sanna bananirangko ra·engon ka·donga gri ong·jana gita chinga ia obostako name am·sandina nangnikaha. Mikkangchi iandakgipa obostarang ong·taijana gita chinga kamko ka·gen,” ine Health Minister aganaha.
Ia me·chikni atchidaldal bi·sa siani gimin tangka paisarangko gamchina dabienggipani bidingo sing·on, da·o dipet ia obostani bidingo inquiry-ko dakna a·bachengatahani gimin tangka paisarangko gamani giminde ua mamingkoba aganna man·kujawa ine Lyngdoh parakataha.
“Angna talataniko on·ani aro angni ma·siani gitade, ia bi·sani sianio doctor-rang ba gipin kam ka·giparangni maming dakgualani dongja,” ine Health Minister aganaha.
Ia bi·sa siangahani gimin an·tangni suk ong·gijaniko parakatengon, ia bi·sa atchiaonin saengachim aro ia bi·sa grapjani gimin oxygen-ko on·na nangaha ine Lyngdoh janapatenba, ia bi·sa saesa siaha aro ianode hospital-o kam ka·enggiparangni maming dakgualani dongja gita nika,” ine Lyngdoh aganaha.
Indake ong·engon, ua Sukrobar salo NEIGRIHMS-ona re·angenba, bi·sani ma·gipako grongegen aro NEIGRIHMS-ni doctor-rango sing·sandiegen ine Lyngdoh parakataha.
“Una agrede da·o dipet anga mamingkoba ku·rachakna man·kujawa. Anga an·tangde iani bidingo u·i-ma·sigipa ong·pajani gimin officer-rangni aganani gitasa dakna man·aigen,” ine Health Minister aganaha.