U·IATTIMGIPAONI
TURA: Adokgre jolo donggipa Assam a·dokni Mariampur minggipa A·chik songo, mande siaona re·ange challan na·tokko cha·bagipa manderangoni sak ritchana baten saanirangko man·ahani a·sel hospital-rango donatako man·tokaha ine kobor on·aha.
A·chik Organisation for Social Welfare-ni president Gripping Marak-ni u·iatani gitade, Budbar salo, Adokgre, Kharkutta aro uandakgipa dingtang dingtang songrangoni bang·bea manderang, Mariampur songo mande sigipaona re·ange uano na·tok on·ako cha·aha aro ia na·tokko cha·ani ja·man, bang·a manderangan saaniko man·ahani gimin hospital-rangona ra·angna nangtokaha.
“Chingni kobor man·soani gitade, komibeoba sak 160 manderang, ua songo challan na·tokko cha·e saaniko man·tokaha. Uni gimin mikkangchi Assam aro uandakgipa dingtang dingtang a·dokrangoniko na·tok ba broiler-rangko Garo Hills-ona ra·baengon, name niesa ra·bachina gita chinga a·jani official-rangko didienga,” ine Marak parakataha.
Indake ong·engon, ia apsan na·tokrangkon Garo Hills-ni dingtang dingtang biaprangonaba ra·angenggnok ine AOSW-ni president janapatenba, challan na·tok aro broiler-rangko bree cha·engon, simsakchina gita Garo Hills-ni manderangkoba didiataha.
