U·IATTIMGIPAONI
SHILLONG: NPP-chi dilenggipa MDA 2.0 sorkariko be·atna gita Meghalaya a·dokni Trinamool Congress (TMC)-ni dilgipa Mukul Sangma baksa agangrika inako a·dokni Cabinet Minister aro BJP-ni dilgipa AL Hek jegalatenba, TMC ba Congress dol baksade BJP maming saloba kamrangko ka·rimna man·jawa ine parakataha.
TMC-ni dilgipako gronge agangrika inako jegalatengon, “Da·al anga songbadniko niksoe jagokmanpiljok indiba MDA-II sorkariko rikchengaonin angaba Mukul-ko aro uaba angko changsaba gronga dongkuja,” ine Hek parakataha.
Assembly session-ni somoio cha ringmitingosa uamang sakgni, bal·ekgrike roaiahachim ineba Hek parakataha.
“Assembly Session-ni somoio cha ringmitingosa Speaker-ni chamber-o chinga sakgni golpoe roenba, angaba BJP-o napchina aro uaba angko TMC-o napchina bal·ekgrike roaha,” ine BJP-ni MLA talataniko on·angaha.
“Sorkariko be·atna ba MDA sorkarini kosako chingni gisepo maming golpoanirang dongjaha aro Assembly Speaker-ni chamber-osa uamang sakgni bal·ekgrike roaiaha,” ineba ua aganaha.
An·tangni portfolio-na kusi ong·aniko parakatengon, MDA-II sorkariko rikaoni da·o jagnisan ong·engpiti aro a·doko bang·en kamrangko nikna man·engaha ine Hek parakataha.
NPP baksa kamrangko ka·aniode maming neng·nikanirang dongja ine janapatengon, “TMC ba Congress baksade BJP maming saloba kamrangko ka·rimjawa,” ine BJP MLA parakataha.
“TMC aro Congress dolni membor-rang gimikan BJP baksa bakrimgenchimosa dingtangani cholrang donga,” ine Hek aganaha.
TMC, Congress aro uandakgipa dolrangna BJP-ni do·gako pangnan oe donaienga ineba ua aganaha.
Budbar salosan, TMC-ni dilgipa Mukul Sangma-ba BJP baksa bakrimna AL Hek baksa agangrika inako jegalatahachim.
