U·IATTIMGIPAONI
SHILLONG: Reservation Policy-ko gital dake nipiltaichina aro roster system-ko ra·gatkujaskal kamo ra·aniko dontongchina dabianiko konta 48-ni gisepo knachakjagenchimode sorkarini kosako jingjengatanirangko dakanggen ine Sukrobar salo Voice of the People’s Party (VPP) mikrakataniko on·angaha.
Sukrobar salo, VPP-ni jinma tom·bimonganiko Additional Secretariat-o ong·atanio VPP-ni president aro Nongkrem-ni MLA Ardent Miller Basaiawmoit, jinmana aganprakengon, uamangni dabianirango bakrimchina gita manderangko didiangenba, uamangni mongsonggipa dabianiara reservation policy-ko gital dake nipiltaichina dabianisa ong·enga ine talataniko on·angaha.
Reservation policy aro roster system-ni bidingo a·dokni Chief Minister Conrad Sangma-na memorandum-ko on·na gita Sukrobar salo VPP-ni membor-rang, Additional Secretariat-o tom·bimonganiko ong·atangahachim indiba Chief Minister dongjani gimin uamang memorandum-ko a·dokni Deputy Chief Minister Sniawbhalang Dhar-ni jako on·angskaaha.
State reservation policy-ara 1972 bilsio ra·gatgipasa ong·e da·o gitchambeaha aro a·doko mande jelbra jelsuanirangba batahani gimin da·o Reservation policy-ko gital dake taripiltaipilna nangengaha ine ia tom·anio North Shillong-ni VPP MLA Adelbert Nongrum parakatskaaha.
Reservation policy-ko gital dake taripiltaichina dabitokengoba, gitcham reservation policy gitan kamrangko on·enga ine VPP-ni dilgiparang matnangatenba, konta 48-ni gisepo kam on·aniko dontongchina aro reservation policy-ko gital dake nipiltaichina dabiangaha.
