SHILLONG: Shillong songjinmaona dakanggipa Umiam dolongko re·ange nieanio da·o dipet name nikkuenga indiba obostako nambate ma·sina gita ia dolongko IIT-Guwahati-oni u·i-ma·sigipa manderangni name niatna sorkari tik ka·aha ine Mongolbar salo, a·dokni Power Minister AT Mondal parakataha.
Ia Umiam dolongko IIT-Guwahati-ni expert-rang, adita salrangna skangsan, a·dokni Power Minister AT Mondal baksa nieahachim ine nikna man·a.
“Chingni ia dolongko nieaniode maming ong·ja gita nika indiba obostarangko nambate ma·sie ra·na chinga Guwahati IIT-ni official-rangko name porikka ra·e nichina tik ka·aha,” ine Mondal aganaha.
Ning·aniko name porikka ra·e nina man·osa ia dolongni obostako nambate ma·sina man·gen ineba ua aganaha.
Ia dolongko porikka ra·e nina gita Guwahati IIT-na pakwatmanaha ine janapatengon, “Da·o sorkarini official-rang company-ona re·ange, porikka ra·ani bewalrangko niegen aro ia dolongko porikka ra·e niengmiting somoio konta gittamoni kontadokmangnade dolongko chipe donchengna nanggen indiba da·o dipet tarikko tik ka·kuja. Tarikko tik ka·ahaon jinmana u·iatgen,” ine Power Minister parakataha.
Ia dolongko porikka ra·e nina gita ramako chipatchengani somoio Guwahati-ona re·enggipa garirangko gipin rama gita watskagen ineba Mondal talataniko on·angaha.
Ia Umiam Dam-ko 1960 bilsirango Assam State Electricity Board rikaha ine see rakkiani dongachim.
