SHILLONG: Meghalaya a·dokni Reservation Policy-ko gital dake nipiltaina expert committee-ko songaha ine sorkarioni u·iataniko man·kujaskal, Voice of the People’s Party (VPP)-ni president Ardent Miller Basaiawmoit, okumu chake jingjengataniko dontongkujawa ine u·iataha.
1972 bilsio ra·gatgipa reservation policy-ko gital dake nipiltaichina dabienba, VPP-ni president Ardent Miller Basaiawmoit, re·anggipa May 23 tarikonin, Additional Secretariat sambao donggipa parking lot-o okumu chake jingjengatengachim ine nikna man·a.
Indake ong·engon, roster reservation committee-ni tom·aniko ong·atanio dingtangmancha resolution-ko ra·e, reservation policy-ko nipiltaina gita ain aro niam bidikni gimin u·i-ma·sigipa manderangchi dingtangmancha expert committee-ko songchina ia committee, a·dok sorkarina sedoatna tik ka·angaha ine Budbar salo, VPP-ni general secretary Dr Ricky Syngkon parakataha.
Sal 15-ni gisepon pilak dolrangan an·tangtangni chanchianiko committee-ona sokatna nanggen ine committee-ko dilenggipa chairperson-ni u·iatgipani gimin sing·on, ua da·o songna sienggipa expert committee-ni giminsa aganengachimkon aro uamang an·tangtangni ku·pattiani aro chanchianirangko on·na nanggen ine VPP-ni general secretary Syngkon parakataha.
