SHILLONG: Re·anggipa Sonibar pringwalo, Ri Bhoi Youth Federation (RBYF)-ni vice president Lankupar Sawkmie, scooty a·sel ong·e saknaanirangko man·aha aro ja·mano ua nampilna gita man·jae, janggitangko gimaatna nangaha.
Kobor on·timgiparangni u·iatani gitade, Sonibar pringwalni 1:30 bajimango RBYF-ni vice president, scooty sale re·baengachim indiba uni scooty, Demseiniong jolo tang·skote a·sel ong·aha.
A·sel ong·anio uni helmet-ba go·okahani gimin ua uni skorango bilongbee mata bu·anirangko man·aha ine kobor on·timgiparang parakataha.
A·sel ong·ani ja·mano Sawkmie-ko Shillong songjinmani Bethany Hospital-o done sanna bananiko on·engachim indiba ua bilongbee saknaanirangko man·ahani a·sel apsan salni 11:00 bajimango siangna gita nangaha ine kobor on·aha.
Uni tanggitik a·sel ong·e sianina KSU, FKJGP, RBYF aro uandakgipa dingtang dingtang dolni dilgiparang kalimpaaniko parakattokaha.
Sawkmie-ni sianganiara RBYF aro NGO-rangnasan gimaani ong·aijaha indiba Khasi-Jaintia jat gimiknan dal·bea gimaani ong·aha ine NGO-ni dilgiparang parakataha.
Sawkmie-ni manggisiko da·al Sombar salni 2:00 bajimango Lawmali-o donggipa Mawkhar Presbyterian gopramo gopgen ine kobor on·timgiparang u·iataha.
