SHILLONG: 1972 bilsini Job Reservation Policy-ko nipiltaina gita sorkarini songe on·gipa expert committee-na term of reference (TOR)-ko tariani bidingo chanchirimna gita Mongolbar salo a·dokni Cabinet tom·gen.
Official-rangni u·iatani gitade, expert committee-ni membor-rangko seokani giminba ia tom·anio Cabinet chanchianggen.
Job reservation policy-ni gital reservation roster system-ko ra·gatani giminba ia tom·anio Cabinet chanchiangnaba gnang ine official-rang parakataha.
Re·anggipa Sonibar salo, Garo Hills-ni dingtang dingtang dolrang baksa tom·e chanchirimangani ja·man, gital roster system-ko ra·gatani bidingo a·dokni Cabinet, June-ni 6 ba 7 tariko tom·e chanchigen ine a·dokni Chief Minister Conrad K Sangma parakatahachim.
Ia tom·anio Garo Students Union, Garo Graduates Union aro dingtang dingtang dolrangko man·chape gimik dol 19 NGO-rang bakko ra·angahachim.
Chief Minister baksana ia tom·anio cabinet minister-rang, a·dokni chief secretary aro dingtang dingtang sorkari officer-rangba dongpae bakko ra·angahachim.
Ia tom·anio a·dokni Chief Minister, mongsongbate roster system-ni bidingo Garo Hills-ni dingtang dingtang dolrangna agan-talate on·angaha.
Ia tom·anio bak ra·gipa dolrangoni bang·batan da·o roster system-ni gimin ma·sitokahani gimin Shillong-ona re·angpilahaon roster system-ko ra·gatani bidingo cabinet chanchie nanga gita ja·kurangko de·angna man·gnok ineba Chief Minister, an·tangni ka·dongchakenganiko parakataha.
