SHILLONG: Khasi aro Jaintiarangna batede A·chikrang politics-o gisikni gita brebata ine Sombar salo, United Democratic Party (UDP)-ni MLA Paul Lyngdoh a·kangataha.
Iani bidingo kobor ra·timgiparangna talataniko on·angengon, Khasi aro Jaintia Hills jolni manderangde pilak kamrangon indinariba ku·rang on·e rotokaia indiba A·chikrangde gisikni gita breaniko aro chanchina changaniko mesokaha ine Lyngdoh parakataha.
Lyngdoh-ni parakatani gitade, 2023 bilsini election-oba Khasi aro Jaintia Hills-ni manderangde Khasi chief minister-nasa dabitokaha indiba Garo Hills-ode iandake dabianirangko dakgija kamchisa mesokskaaiaha.
Ia 2023 bilsini Assembly election-o A·chikrang, Garo Hills-ni dam 24 seat-rangoniko dam 18-kode NPP-na on·e Khasi chief minister-na ka·donganiko bon·atsrangaha ineba UDP-ni MLA parakataha.
A·chikrangde iani bidingo maming ku·rang on·gijan kamchisa mesokaiaha ine janapatengon, “An·chingsa Khasi chief minister-na dabie, uamangba Khasi Hills-ni chief minister-on dongtobatgen ine uamangni ning·ao ding·chaoataniko ra·baaha aro uamang NPP-ko seokskaaiaha,” ine Lyngdoh parakataha.
