SHILLONG: Batanggimin adita salrangni gisepo Meghalaya a·dokni dingtang dingtang biaprango mikkarang aditan waangahaoba Umiam dam-o chirang chu·ongsrangkujaengani gimin load shedding ba bijoliko kimitna nangangkunaba gnang.
Mongolbar salo, MeECL-ni Chairman aro Managing Director ong·enggipa Sanjay Goyal-ni kobor ra·timgiparangna parakatani gitade, Umiam dam-o chi tu·ani feet 6 ba feet 7-mangni gita bariangahachim indiba da·o chini tu·ani chu·ongsrangkujaengani gimin bijoliko chu·onga gita bikotna man·kujaenga.
“Da·o mikkarang dontongpiltaina nanggenchimode Umiam dam-o chini tu·ani sal 10 ba sal 11-mangnaba bijoliko bikotna chu·ongjawa,” ine Goyal parakataha.
Load shedding ka·aniko apsan dake dongatna gita a·dok sorkari, NTPC aro gipinrangoniko bijoliko brena gita nangkuenga ine janapatengon, Leshka Hydro Electric gita dakgipa gipin project-rangde chiringrangonikosa ra·engani gimin bijoliko rakkie jakkalani cholrang dongja ine MeECL-ni Chairman-cum-MD parakataha.
Mikkarang waangkue obostarang namkalgenchimode load shedding-ni somoiko sorkari bakkandikatna gita jotton ka·gen ine janapatengon, “Mikkarang nanga gita waani somoirangode chinga man·a dipet salni somoirangode bijoliko kimitjaenga,” ine Goyal parakataha.
