TURA: June 16 tariko ong·atenggipa Central University Entrance Test (CUET)-ko sena gita Tura Don Bosco College-ni komibeoba sak 40 chatro chatrirangna Ranchi-ko examination centre dake donataha aro ian chatro chatrirangna jagokmanpilani gita ong·aha.
Don Bosco College-ni Principal Fr Bivan Rodriques Mukhim-ni parakatani gitade, Tura-o CUET centre dongkujani gimin bang·bata chatro chatrirangan Shillong ba Guwahati-osa CUET-ko sena gita dorgastorangko galahachim indiba chatro chatrirangna Tura-oni km 600 chel·ao donggipa Ranchi-osa CUET centre dake on·aniara namen aiao inmanbeani ong·ahachim.
“National Testing Agency-ni iandake skatang chatro chatrirangna porikka sechakani centre-ko on·aniara chatro chatrirangna aro uamangni nokdangrangna namen jagokmanpilaniko ra·baaha,” ine Fr Mukhim parakataha.
Koborko on·ani gitade, CUET-ko da·o Sukrobar salon ong·atengahachim aro ia porikkako sena gita admit card-rangko Budbar pringosa chatro chatrirang man·tokahachim.
“CUET porikkana da·o salgnisan dongaiaha indide maikai indita bakkandikbegipa somoio chatro chatrirang, km 600 chel·ao donggipa biapona re·ange porikkako sena gita tarisrapkugen,” ineba Don Bosco College-ni Principal sing·doataha.
Fr Mukhim-ni parakatani gitade, Don Bosco College-ni chatro chatrirang, Ranchi centre-o CUET-ko sena nangenga ine seatgipa chittiko Budbar pringosa ua Education department-oniko man·soahachim.
Koborko on·ani gitade, North Eastern Hill University (NEHU)-ni Environmental Studies (EVS) porikkakoba da·o June 20 tarikon ong·atengani gimin CUET aro ia porikkakoba sena nangenggipa chatro chatrirang neng·nikanirangko chagrongna nangbatengahachim.
Tura-ni chatro chatrirang, CUET-ko sepangkala biapo sena man·na gita ta·raken maikoba dakatchina gitaba Fr Mukhim, a·dok sorkari aro Education official-rangko didiataha.
