SHILLONG: Khasi Hills Autonomous District Council (KHADC)-o United Democratic Party (UDP)-chi chalaienggipa Executive Committee (EC) be·gruanio ua an·tangba aro National People’s Party (NPP)-ni gitaba maming jak dongja ine Budbar salo NPP-ni national president aro a·dokni Chief Minister Conrad K Sangma a·kangatenba, district council-rangni politics-ode a·dok sorkari jak on·rongja ine talataniko on·angaha.
Re·anggipa Sombar salo, KHADC-ni gitcham chief executive membor Titosstarwell Chyne-ni kosako NPP aro Congress dolrang bakrime, No-Confidence-ko motion-ko ra·gatangani ja·man UDP-chi chalaienggipa EC be·gruna gita nangahachim aro iana NPP-chi dilenggipa Meghalaya Democratic Alliance (MDA)-o bak ong·paenggipa UDP, suk ong·gijaniko parakatahachim.
Iani bidingo talataniko on·angengon, “Autonomous district council-o nangchakegipa kamrangde uamangni gisepo ong·enggipa kamrangsan ong·aia ine chinga pangnan aganronga maina district council-ni politics aro kamrangode a·dok sorkari jak on·na man·ja,” ine Sangma parakataha.
District council-rangara an·tangari jakgitele chalaigipa bimangsa ong·e sorkariba dingtangsa ong·a aro politics-oba district council-rang an·tangtangni skani gita dakna man·a ineba Chief Minister parakataha.
District council-rangko chalaianio dingtang dingtang neng·nikanirang donga ine janapatengon, ia neng·nikanirangko uamang an·tangtangan namatchina gita sorkari, district council-rangna ku·pattianiko on·aha ine Sangma parakataha.
“Angni agangimin gitan district council-rangara jakgitelgipa bimangsa ong·ani gimin an·tangari chalaina nanggipa bimangsa ong·a aro chinga uamangna agan-ku·pattianirangko on·ana agrede jak on·pana bil dongja,” ine NPP-ni national president aganaha.
KHADC-o ong·gipa obostana UDP-ni president Metbah Lyngdoh-ni suk ong·jaenggipani gimin janapatskaengon, “Iako chinga darangba ka·dongsoa dongjachim aro iako namao namatchina gita chinga nangnikenga. Indiba nangani kri ja·kurangko de·na nangao ga·aka,” ine Chief Minister parakataha.
