U·IATTIMGIPAONI
TURA: Ma·mong sorkarini ra·gatna miksongenggipa Uniform Civil Code (UCC)-ko Meghalaya a·dok baksana salgro salaram a·dokrango dingtang dingtang dolrang jegalsotokengon, ian a·songni ‘general area’-rango ra·gatna sienggipa niamsa ong·ani gimin Constitution-ni Sixth Schedule ning·o chel·chakako man·enggipa Tribal a·dokrangnade nangchakeani dongjawa ine BJP-ni state vice president aro Tura-ni MDC Bernard N Marak a·kangatskaaha.
“General area ine aganengon uan gimikna tarigimin niamchi chalaigipa ba sason ka·gipa biaprangkosa miksonga aro ian Constitution-ni dingtangmancha on·gimin niamni ning·o chel·chakako man·enggipa Tribal area-rangnade nangchakeani dongjawa. Salgro salaram jolrangko skangonin nichanggalahani gimin ia jolrangko tang·doatna gitasa BJP nangnikenga aro Tribal-rangni nitobegipa daka rikanirangko nisigalna miksonganirang dongja. A·dokko sason ka·anio dingtang dingtang political dolrangni ra·e katgimin Tribal-rangni biaprangko aro daka rikanirangko ra·bapilnasa BJP nangnikenga,” ine Marak parakataha.
Batanggimin sorkarirang Tribal-rangna ku·rachakanirangko chu·sokate on·chipjaha ine matnangatengon, Tribal-rangni jakgitele sason ka·ani bewalrangko political dilgiparangna dangdike on·gipa manderangsa nisigalaha ine BJP-ni state vice president parakataha.
“Sixth Scheduled a·jarango sawa Municipality-ko a·bachengataha? Scheduled Tribe-rang maini gimin District Council-rangni on·gipa ST certificate-rangni pal Deputy Commissioner-rangni on·gipa Scheduled Caste (SC) certificate-rangkosa jakkalna nangaha? Rural Development ba songadam nokadamrangko namdapatani scheme-rangkoba autonomous district council (ADC)-rangsa jako ra·na nangachim indiba maini gimin DRDA-rangsa ra·skana nangaha?” ine Marak sing·doataha.
Uniform Civil Code (UCC)-ara tribal-rangnade maming nangchakeaniko ra·bajawa ine a·kangatengon, ian general area-rangna miksonge tarigipa niamsa ong·ani gimin Tribal-rang iana jajrengna nangjawa ine Marak parakataha.
Indian Constitution-ni ning·o Tribal-rangna on·gipa niamrangni gimin skulrango skie on·jahani a·selsa da·alo Tribal-rang, an·tangtangna on·gimin bilrangni bidingo ma·sitokjaha ineba BJP-ni state vice president parakataha.
