U·IATTIMGIPAONI
TURA: Sukrobar salo, Meghalaya Legislative Assembly-ni Speaker Thomas A Sangma, Sloping Agriculture Land Technology (SALT) project-ko Nokrek Biosphere Reserve-ni ja·reko donggipa Sasatgre songo a·bachengate on·angaha.
Ia project-ko a·bachengate on·angani somoio a·dokni Soil & Water Conservation Minister Marcuise N Marak, gipin dilgiparang aro dingtang dingtang department-ni officer-rangba dongpae bak ra·angtokaha.
Ia project-ko da·o dipet West aro East Garo Hills a·jao donggipa Baladinggre, Dura Kalakgre aro Sasatgre songrango ra·gatchengenga aro ja·mano ia project-ko Garo Hills-ni gipin biaprango ra·gatangna sienga.
Ia SALT project-ko a·bachengate on·angani somoio Meghalaya Assembly-ni Speaker, jinmana aganprakangengon, ia project-ko kan·dike SALT mingani kri, ian a·arangni ruronganiko champengna aro a·mitimko on·na kari gita kam ka·anggen ine parakangaha.
Meghalaya a·dokara a·gilsak gimiko mikka wabatsranggipa biap ong·genchimoba chirang a·ao sikkonge dongaigija Assam aro Bangladesh-onasa jokangengani gimin a·ran karini somoirangona chirangko ripinge donna nanga ine janapatengon, ia bilsio mikkarang ja·manchakbeesa aro komibatesa mikkarang waengani a·sel Garo Hills-oba chaktopilgija ding·anirangko chakna nangenga ine Sangma parakataha.
SALT project-ni gimin talataniko on·angengon, ian a·brirango aro a·ba o·e cha·gipa biaprango chirangko rakkina aro a·arangni ruronganiko champengna miksonge ra·gatgipa project ong·a ine Assembly Speaker parakataha.
Ia tom·anio Soil & Water Conservation Minister Marcuise N Marak-ba jinmana aganprakangengon, ia sal somoirango manderang chaktopilgija ding·anirangko chakna nangengani gimin samtangtango ong·telaigiparangko ripingchina gita manderangko didiangaha.
A·ba o·e cha·anichi nangchakeanirangko man·engani gimin janapatengon, buring bolgrimrango donggipa bol wa·arangko den·anichi samtangtango ong·telaigiparangna nangchakeaniko ra·baenga ine Marak, ia SALT project-ko ra·gataniara Garo Hills-ni manderangna bang·a dakchakani ong·gnok ine parakataha.
