U·IATTIMGIPAONI
SHILLONG: Manipur a·doko dingtang dingtang jatrangni gisepo dinggrike so·sojengjeng ong·anichi katbrange dongna nangenggipa manderangoni sak 77-de Shillong-o ma·chakkuenga ine Mongolbar salo, East Khasi Hills a·jani Deputy Commissioner RM Kurbah parakataha.
Deputy Commissioner-ni press conference-o parakatani gitade, Manipur a·doko so·sojengjeng ong·chakatmiting somoirangode sak 300-na baten Shillong songjinmaona katbae ma·chaktokahachim indiba uamangoni bang·batan da·o Aizawl, Guwahati aro uandakgipa dingtang dingtang biaprangona apjitangskaaha.
Manipur a·doko re·anggipa May jani 3 tarikonin dingtang dingtang jatrangni gisepo dinggrikanichi bang·a manderangan so·otanirangko man·ahachim aro bang·a manderangan nokgri jamgri ong·e dongna nangtokengahachim. Iandake so·sojengjeng ong·engani gimin Manipur a·dokni bang·a manderangan gipin a·dokrango katnape ma·chaktokskaengachim ine nikna man·a.
Indake ong·engon, East Khasi Hills a·jao aro mongsongbate Shillong songjinmao walni somoirangode kenchakna nanganirang ong·engahani gimin manderangko walni 10:00 bajini ja·mande man·a dipet ong·katgija noktangtangon nape dongchina gita East Khasi Hills a·jani Deputy Commissioner didiataha.
Shillong songjinmao pilak dokkanrangkon walni 10:00 bajion chipchina gita District Administration ge·etaniko on·enba, Section 144 CrPC-ko ra·gatangahachim ine nikna man·a.
