U·IATTIMGIPAONI
SHILLONG: Meghalaya a·dokni dingtang dingtang biaprango niam gri chalaienggipa coke plant ba koela so·a karkanarangko sorkari pe·galna gita a·bachengatahaoba, Mongolbar salo mikkarang dontonggija waangahani a·sel East Jaintia Hills a·jao niam gri chalaienggipa karkanarangko pe·galna gita man·jaha ine kobor on·aha.
East Jaintia Hills a·jani Deputy Commissioner Abhilash Baranwal-ni parakatani gitade, Mongolbar salo mikkarang waahani a·sel niam gri chalaienggipa karkanarangko pe·e galna man·jahaoba, East Jaintia Hills a·jao niam gri chalaienggipa dam 34 karkanarangko pe·galna gita kamrangko ka·enga aro uandaken ia karkanarangko Budbar salo pe·galna gita dolgni manderang kamrangko ka·engaha.
Mongolbar salo, ia karkanarangoni mitamrangkode pe·galna gita pakmarangko pumanahachim indiba mikkarang jimbate waangahani gimin kamrangko dontongpilna nangao ga·akaha ine DC parakataha.
Indake ong·engon, komibeoba damgittam karkanarangkode Budbar salon pe·e galna man·na gita dolgni manderangko kamo donataha aro gipin karkanarangkoba chu·gimik pe·e galna gita kamrangko ka·enga ine Baranwal parakataha.
Mongolbar salonin a·bachenge East Jaintia Hills a·jao niam gri chalaienggipa dam 34 karkanarangko sorkari pe·e galna gita kamrangko ka·engahachim.
Ia coke karkanarangoni bang·batan Meghalaya State Pollution Control Board (MSPCB)-ni nangchongmotgipa lekkarang dongjachim ine kobor on·timgiparang parakataha.
Re·anggipa July 8 tarikonin West Khasi Hills a·jani Shallang jolrango niam gri chalaienggipa karkanarangkoba sorkari pe·e galna gita a·bachengatahachim.
Ia karkanarangko pe·e galengmiting somoio maming golmalrang dongjana gita District Magistrate, Section 144 CrPC-ko ia jolrango ra·gatangaha.
