U·IATTIMGIPAONI
TURA: Bristibar salo, Garo Students Union (GSU) Eastern Zone-ni dilgiparang, a·dokni Education Minister Rakkam A Sangma-ko grongenba, East Garo Hills a·jao donggipa Rongrenggre Govt Higher Secondary School-ni dingtang dingtang nanganirangko niatchina gita didie segipa memorandum-ko on·angaha.
Education Minister-na seatgipa chittio ia skulni gimin janapatengon, ia skulo batanggimin bilsi bongana kingking full fledged principal-ko man·kujaengani a·sel chatro chatrirangsan ong·aigija skulo skigiparang aro gipin kamrangko ka·gipa manderangba neng·nikanirangko chagrongna nangtokenga ine GSU-EZ parakatenba, ia skulna ta·raken full fledged principal-ko on·atchina didiataha.
Ia skulni pilak class-rangon chatro chatrirang nangana bate bang·dugaengani a·sel class-rangko name on·na man·jaenga ine janapatengon, skigiparangko class-o chatro chatrirang dongani kri on·skachina gita GSU-EZ, a·dok sorkariko didiataha.
Ia skulo library, science laboratory, namgipa toilet-rang, ringani chirang aro common room-rang dongjani a·sel chatro chatrirang neng·nikanirangko chagrongna nangtokenga ineba GSU EZ parakataha.
Ia gital chasongo ia skulni chatro chatrirangba a·gilsakni gipin biaprango gitan gital chasongni kolrang baksa skie ra·pana man·na gita pilak classroom-rangon nangani kri computer aro internet-rangko donchina gita GSU-EZ didiataha.
