SHILLONG: A·dok sorkari, Diengpassoh-o green field airport-ko rikna miksonganiko dontongate Umroi-o donggipa Shillong airport-ko namdapatna nangnikskaenga, jean bang·en infrastructure-ko nangkuenga.
Chief Minister Conrad Sangma, adita jarang skangsan Civil Aviation-ni Minister Jyotiraditya-na chittiko seate, Shillong Airport-oni A 320/A 321 rokomni aircraft ba sildorengko watna cholko man·a gita nangnika taridapanirangko nirokatchina mol·molataha.
Airport-oni A320/A 321 aircraft-ko watna ba a·bachengatna Ministry-ni Obstacle Limitation Surface (OLS) survey ka·anio sorkari dakchakna aganaha.
Mol·molatani gitan airport-o Obstacle Limitation Surface (OLS) survey-ko ka·aha indiba report-ko man·kujaenga.
Indake ong·engon Conrad Sangma, Ministry-ni Shillong Airport-ko UDAN scheme-ni gita international airport-ona dakatskaaniko nangnikenga. Jedakode Meghalaya-ona bang·bate tourist ba songregiparang sokbagen.
Minggipin sorkari, mija bilsi 2022-o a·doko Greenfield project-ko a·bachengani giminba chanchiahachim. Indiba Greenfield airport-ko rikanio bang·bee tangka paisa aro somoiko nanggen ine Conrad Sangma, janapataha.
Niatgenchimode sorkari, Greenfield airport project-ko mikkangchina ra·anga ong·ode, uko matchotna bilsi 8 somoiko nanggen. Maina Meghalaya a·doko greenfield airport-ko rikanio tangka paisani gita koros ong·a bilonga baksana dingtang dingtang neng·nikarangba donggen. Minggipin da·o donggipa Umroi Airport-o aditan infrastructure-rang donga, jeni a·sel chonchongipa flight ba sildorengrangko watenga, indiba infrastructure-ko namdapatna nangkuenga.
Iarangni gisepon Umroi Airport-o skangna baten da·ode adita namdapaniko ba tang·doaniko nikna man·aha. Meghalaya-ni nitogipa biaprangko mesokgipa noksarangko LED screen-o nichina donaha. Iarangna agreba airport-o signage-ko jolni Khasi ku·sikchiba see donaha. Airport-o toilet ba paikanani gimin neng·nikaniko namataha.
Airport-o additional parking bay-ko rikaha, indiba daitoko jako ra·e kam ka·gipa authority-ni ra·chakaniko nangkuenga.
Indiba Airport-o aditan neng·nikarang dongkuenga, uni gimin namdapatna nanganirang dongkua. Iani bidingo Airport authorities, a·dok sorkarina chittiko seataha.
