SHILLONG: Meghalayao Uniform Civil Code (UCC)-ko ra·gatna am·ode raken jegalgen ine HSPDP chanchie tik ka·aha.
CEC tom·ani matchote koborni manderangna aganengon, UCC-ni gimin namedake chanchirime niani ja·mano, iako raken jegalsona gita party-o tik ka·aha ine HSPDP president KP Pangniang mijalo aganaha.
“Sorkari, a·song gimikon ia UCC-ko ru·utgijan ra·gatgnok ingipa kattarangko chinga media-oniko knaaha, unigimin chingni a·doko ia UCC-ko ra·gataniko chinga raken jegalsogen aro chingni jegalsoani chittikoba sorkarina see on·gen,” Pangniang aganaha.
KP Pangniang indakeba aganaha je, a·doko Reservation Roster-ko ra·gatani bidingoba uamangni agan-ku·pattianirangko see jote Sorkarina on·gen, maina da·o dipet chingni memborrangonin, sorkarina pakwatna skang talgrikaniko nangnikkuenggiparangba dongenga, indiba ru·utgijan sorkarina see jote on·gen, HSPDP dilgipa aganaha.
Roster system-ko gitchamoni ra·gija mikkangchinasa tarichina gita party-ni ku·pattianiko knachakani giminba HSPDP, Sorkariko mittelaha.
Unbaksana, bangbanggipa post-rango A·dokni a·palchini A·chikrangko gapataniko champengna gita reservation policy-ni clause-ko taridapani giminba party president, Sorkariko mittelaha.
