Garo Hills-ni Legislator-rang Winter Capital-na dabianio maina jrip dongenga? NGO  

Tura: ACHIK aro gipin NGO-rangni bakrime Tura-ko Winter Capital songna dabie okumu chake jingjengatanio Garo Hills a·jaoni sak 23 MLA-rang, da·onan mamingkon ku·wata dongja, jrip dongengani gimin Achik Youth Movement for Better Society (AYMBS), jagoke aiao inmanpilaniko parakataha.  Da·odipet saksamangmang Gambegre-ni MLA Saleng Sangma-san okumu chakenggiparangna chakpaaniko on·kuenga.
ACHIK aro gipin NGO-rangni  memborrang, Tura-o batanggimin adita salrangonin Winter Capital-ko songchina aro backlog appointment-ni gimin dabienga.
“Saleng Sangma-ko wate, Garo Hills-oni sak 23 MLA-rang okumu chake dabienggipani bidingo mamingkon agangija jrip dongenga, iako nike chinga jagokpila, maidake an·chingni a·jani dilgiparang ia mongsonggipa bidingo ku·watgija dongna man·a. Okumu chakani anti gni gapnasiengjok, indiba da·onan chingni seokgipa representative-rang, jrip dongaienga, ian namen dukni katta ong·a,” ine AYMBS-ni president, Peterjob A Sangma aganaha.
Election-ni somoio campaign ka·mitingode MLA-rang, songsalna aro jatni namgnina ja·ku de·na ku·rachakahachim aro jinmani palo uamangan ku·rangko on·gen ine ka·dongatahachim, indiba da·ode, uamangni ku·rang baosa, maini gimin da·onan jrip dongenga, iako chinga ra·chaknan man·jaenga, ine Peter aganaha.
“Garo Hills a·jao songdonggiparang, Winter Capital-ko man·a kragipa ong·a. Jekon an·chingni dilgiparangoni a·dokko man·an krengdilgiparangan on·na ku·chakangaha. Indiba da·onan uko chu·sokatna maming ja·ku de·ani dongkuja. Bilsi 1970-o Tura-o skanggipa cabinet meeting-ko ong·ataha.”
Mikkangchiba Garo Hills a·jani legislator-rang da·on gitan jrip dongangkua ong·ode, mikkang bilsini Lok Sabha election-o uamangba aganchakna nangskagen.
“Chingan na·simangna vote-ko on·e chuataha dal·ataha aro chugipa gadangona ra·doaha, uni gimin chingni dabianina gisik on·china nangnikskaa. Chinga ong·gija ba man·a kragijakode ba constitution-ni kosako ong·gipakode dabija. CM aro Governor- uamangan Winter Capital-ko songe on·na ra·chakaniko on·nagiparang ong·a. Chingni sak 23 MLA-rang, Saleng-oniko skie ra·tokna nangenga aro mikkangona re·bae, chingni dabianio chakpana nanga ine Peter agankuaha.”