Tura: Okumu chake jingjengata sal 13 gapengjok, aro salsa batrikrik, Achik Conscious Holistically Integrated Krima (ACHIK), uamangni dabianina chakpaenggiparangko man·e bilakbatenga. Indake ACHIk, Chief Minister Conrad Sangma-ko, Tura-ko Winter Capital songna aro backlog policy-ni gimin maiko dakgen/dakjagen iani gimin ku·watchina mol·molataha.
“Meghalaya a·dokni bakgni eastern aro western a·jako apsangrik nirokna nanga. Batanggimin bilsirangonin Winter Capital-na dabibaenga, bang·arangan Winter Capital-ko ra·gata ong·ode a·dokni gimik bakrangon apsangrik development-ko nikna man·gen unbaksana nambatgipa sorkariko rikna man·gen ine ka·dongani donga,” ine Laben Ch Marak, uni chanchia kattako aganaha.
CM, administrative-ni gita namgnikosan niaigija western a·jolo songdonggiparangni neng·nikarangko nigrike kam ka·na nanga aro Tura-ko Winter Capital songna ja·ku de·na nanga.
“Ian a·dokni damsa jolko tang·doata aro damgipinko watchanganiko champengna dakchakgipa ong·gen. Niatgenchimode Shillong-oni Tura-ona rama namen chel·bea, uni giminba a·dokni westerngipa bako office-ni kamrango namen ja·manchakani donga.”
Uandake okumu chake jingjengatanio da·onaba CM Conrad-oni mamingba katta dongkujani gimin aganatengon, gitcham MCS officer, ‘chingni dabianiko knachakna nanga aro ja·ku de·na nanga’ ine aganaha.
ACHIK, CM-ko a·dokni salaram-saliram bakkon apsangrik nichina agana
Date:
Share post:
