SHILLONG: Meghalaya Medical Recruitment Board (MMRB)-ko songanichi a·doko doctor-rangni chu·onggijaniko namatna gita doctor-rangko kamo ra·anio ta·rakbatgnok ine a·doko MMRB-ko songanina Meghalaya Medical Services Association (MMSA), a·dok sorkariko mittelpilangaha.
Iani bidingo Health & Family Welfare department-ni Principal Secretary Sampath Kumar-na sedoatengon, MMRB-ko songani aro Health department-o sak 400 gital doctor-rangko kamo ra·aniara Meghalaya a·dokni dingtang dingtang health institution-rango sanna banani kamrangko namdapatani gita ong·aha ine MMSA-ni general secretary Dr R Pohsnem parakataha.
Dr Pohsnem-ni parakatani gitade, MMRB-ko songaniara kamo ra·ani bewalrangko nambatatna aro a·doko sanna banani kamrangko namdapatna gita administration-ni on·kange kam ka·aniko mesokani ong·aha.
“Sak 400 doctor-rangko ta·rake kamo ra·aniara sanna banani kamrangko ka·enggipa manderangna bilakbatataniko on·ani gitasan ong·aigija songadam nokadamrango doctor-rangni chu·onggijaniko namatna ja·ku de·aniba ong·aha. Ia gital doctor-rangko kamo ra·anichi da·on a·dokni manderangna namgipa sanna bananirangko on·anio sakkirangko nikna man·engaha,” ine MMSA-ni general secretary parakataha.
A·dok sorkarini iandake niksamsoani gnang kamko ka·aniara a·dokni dingtang dingtang sanchakram biaprango doctor-rangni chu·onggijaniko namatna gita mongsonggipa ja·ku de·ani ong·aha ineba Dr Pohsnem parakataha.
MMRB-ko songahani gimin aro sak 400 doctor-rangko kamo ra·aniko chu·sokatahani gimin ua dingtangmancha Health department aro iano jak dongpagipa pilak manderangkoba mittelpilataha.
A·dokni manderangna an·seng baljokaniko on·na gita MMSA, a·dok sorkari baksa bakrime kamko ka·angkugen ineba Dr Pohsnem parakataha.
