SHILLONG: Bharatiya Janata Party (BJP)-ni saksa dilgipa HM Shangpliang-ni National People’s Party (NPP)-o napna miksongenganiko da·o dipet BJP-ni dilgiparangna u·iata dongkuja ine Robibar salo, BJP Meghalaya-ni dilgiparang a·kangataha.
“Da·o dipet chingnade iani bidingo u·iata dongkuja. BJP-ni dilgipa HM Shangpliang, NPP-o napna miksongenga ine songbadrango seanikode anga poraimanaha indiba da·o dipet chingnade mamingkoba u·iata dongkuja,” ine BJP-ni state president Ernest Mawrie parakataha.
Shangpliang, BJP-ni office-ona re·angjaengaha ine aganiara kakket ong·ama ine sing·anina aganchakaniko on·angskaengon, ua BJP-ona re·bajahaosa iani giminde aganna man·aigen ine Mawrie parakataha.
Indake ong·genchimoba BJP state president-ni parakatani gitade, da·o dipet Shangpliang, Education department-ni adviser-ba ong·engani gimin Education department-ni kamrango jakchakjae BJP-ni adita program-rango bakko ra·ena man·jawa ine Shangpliang, una u·iatahachim.
Iani bidingo Shangpliang baksade mamingkoba agangrikna man·skakujaengachim.
Re·baenggipa 2024 bilsini Lok Sabha election-o a·dokni gitcham IPS officer aro BJP-ni membor, M Kharkrang-ko Shillong Parliamentary seat-oni susaatna miksonganirang dongama ine sing·anina aganchakaniko on·angskaengon, da·o dipet iani bidingo BJP chanchirima dongkuja ine Mawrie parakataha.
Indake ong·genchimoba, re·baenggipa August-ni 9 tariko Lok Sabha Prabhas Yojana-ko Guwahati-o ong·atenga aro ia tom·anio salgro salaram a·dokrango donggipa pilak state president-rangan bakko ra·anggen ine Mawrie parakatskaaha.
Ia tom·anio, re·baenggipa 2024 bilsio ong·atna sienggipa Lok Sabha election-na tarisamsoanirangko BJP-ni dilgiparang apsan chanchirimanggen ineba Mawrie parakataha.
Lok Sabha election-na candidate-rangko seokna skangba BJP, candidate-rangko seokna gita survey-ko ka·chenggen ineba BJP-ni state president parakataha.
