TURA: Re·anggipa July-ni 24 tariko, Tura-ni Mini Secretariat-o dingtang dingtang dolrang baksa a·dokni Chief Minister tom·e agangrikengmiting somoio rang·san so·sojengjeng ong·angani ja·man Garo Hills-ni bang·a chadamberangko aro dingtang dingtang dolni dilgiparangko rim·ahani gimin mikkangchi maming so·sojengjeng ong·anirang dongtaijana gita adita salrangna skang, Tura-o dingtang dingtang mondoliko dilgiparangni nangrime bikotgipa Religious Leaders Forum, dingtangmancha bi·chakanirangko dakangenba, Garo Hills-o tom·tomaniko rakkiangchina gita a·dok sorkariko aro Garo Hills-ni dingtang dingtang dolrangkoba mol·molataha.
Koborko on·ani gitade, Garo Hills-o tom·tomaniko rakkiangchina Nokgipa Isolo jinma bi·chakangani ja·man Religious Leaders Forum-ni membor-rang, West Garo Hills a·jani Deputy Commissioner-ko grongeaha aro tom·tomaniko rakkiangna gita cholrangko sandiani bidingo chanchirimangaha.
Ia apsan salon toromko dilgiparang, Garo Hills-ni dingtang dingtang NGO-rangkoba grongaha aro so·sojengjeng ong·atanirangko kamrangko ka·jachina aro Garo Hills-o tom·tomaniko ra·bapilna gitasa kamrangko ka·china didiangaha.
Iani ja·man, Religious Leaders Forum-ni membor-rang, so·sojengjeng ong·anina rim·ako man·gipa chadamberang aro dingtang dolni dilgiparangkoba grongena chol man·aha aro uamangna bi·chakanirang baksana agan-ku·pattianirangkoba on·baaha ine kobor on·aha.
Indake ong·engon, Garo Hills-o so·sojengjeng ong·anirangko champengna gita social media-rango ding·chaoatani noksa ba kattarangko watjachina gitaba Religious Leaders Forum, Garo Hills-ni manderangko didiataha.
