SHILLONG: Meghalaya a·doko gital National Education Policy (NEP) 2020-ko ra·gatani bidingo adita jajaanirang ong·kuengon, NEP-ko ra·gatanio a·dokna namgni ong·na man·na gita nambate agangrikna North Eastern Hill University aro a·dok sorkariko, Meghalaya College Teachers Association (MCTA) didiataha.
NEHU-ni NEP-ko ra·gatna tik ka·aniko jegalanio maming aganchakanirangko on·kujaengani gimin MCTA-ni non-cooperation movement (NCM)-o bak ra·aniko dakangkuna gita re·anggipa Sukrobar salosan MCTA-ni dilgiparang parakatahachim.
Indake ong·engon, MCTA-ni general secretary Airpeace W Rani-ni parakatani gitade, NEP-ko ra·gatanio a·dokni dingtang dingtang college-rang neng·nikanirangko chagrongna nangkuengani gimin da·o NEP-ko ra·gatgenchimode lekka poraniko on·anio aro chatro chatrirangnaba neng·nikanirangko ra·baskanaba gnangchim.
College-o skigiparangni da·o NCM-ko dakanichi, uamangni dabianirangko knachakna aro Meghalaya a·doko nangani kri kamrangko ka·na gita sorkari aro NEHU-ni dilgiparangna didiani ong·gen ineba Rani, an·tangni ka·dongchakenganiko parakataha.
NEP-ko ra·gatdrana jotton ka·ani gimin sing·dona nanganirang donga ine janapatengon, ia gital NEP-ko Academic Council-ni ra·chakani gri NEHU-o ra·gatdrana jotton ka·aniara niamni kosako re·badeaniko mesokani ong·enga ine MCTA-ni general secretary parakataha.
Meghalaya a·doko skigiparangna gital curriculum-ko ma·sina nanga gita training-rangko on·chenggija NEHU-ni Vice Chancellor ra·gataha ineba Rani, suk ong·gijaniko parakataha.
MCTA general secretary-ni parakatani gitade, ia gital NEP-o currilum-ni paper-rangko bariataniara chatro chatri aro skigiparangni kamrangkosan bariata ong·ja indiba management-ni neng·nikanirangkoba namjabatatani gita ong·engachim.
Iandake skigiparangna maming training gri NEP 2020-ko ra·gataniara lekka porani gadangko namdapatani pal batesa jajaani aro neng·nikanirangko ra·banaba gnang ine janapatengon, NEP 2020-o skill based education ba changa sapanio pangchake lekka poraniko on·anisa mongsongbatgipa ong·enga ine Rani parakataha.
NEP-ko ra·gatanio a·dok sorkari, maming tangka paisani gita dakchakanirangko on·na gitaba jechakengani a·sel dingtang dingtang college-rango, nokrangko rikdapani aro uandakgipa dingtang dingtang kamrango neng·nikanirangko chagrongna sienga ineba ua parakataha.
