AMPATI: Changskugipa National Handloom Day-ko Sombar salo, South West Garo Hills a·jani Garobadha-o donggipa Sericulture & Weaving campus-o maniangaha aro ia salko maniani bak gita bilsi 70-na batgipa ba·ra dokgiparangna mande ra·pilskaaniko dakangenba, ba·ra dokgiparangna dingtang dingtang rokomni kildingrangkoba suale on·angjolaha.
Ia program-ko West Garo Hills District Handloom Office-ni gita ong·atangaha aro ia program-o Ampati-ni Additional Deputy Commissioner YW Momin mongsonggipa sokgipa ong·e bakko ra·angaha.
Ia salko maniani bak gita bilsi 70 batgimin ba·ra dokgiparangna mande ra·pilskaaniko dakangengon, jatni dakbewal rikbewalo pangchake ba·ra dokaniko indita bilsirangna ja·rikbae, gital chasongni manderangna dakmesokaniko on·ahani gimin ADC YW Momin-ni jakchi boksisrangko on·angaha.
Ia program-ko ong·atanio dongpae bakko ra·anggipa gipin manderangara, Tura aro Ampati-ni District Handloom Officer GR Marak, Williamnagar-ni District Handloom Officer Deepak Hajong, department-ni gipin officer-rang aro a·jao ba·ra doke cha·enggipa manderang ong·a.
Ia salko maniani bak gita SWGH a·jao ba·ra doke cha·enggipa ritchani ritcha manderangna Eri aro Silk kildingrangko suale on·angaha.
