TURA: West Garo Hills a·jani ning·o donggipa Jangrapara jolni bilsi 12 ong·gipa me·chik bi·sako drae til·ekenba so·ote galani gimin kalime aro sianggipa me·chik bi·sani nokdangna kakket bichalko on·china dabie, Bristibar salo, Phulbari aro Chibinang jolo donggipa dingtang dingtang NGO-rang, mombatirangko so·e jinma re·jomaniko ong·atangaha.
Ia jinma tom·bimonganiko Chibinang samba jolo donggipa Chandigre songo ong·atangaha aro ia tom·e re·jomaniko GSU, AAYWO, AYMBS, AYWO, CRF, AHAM, FKJGP, GSMC, FAF aro uandakgipa dolrang nangrime ong·atangaha.
Re·anggipa August-ni 1 tariko, bilsi 12 ong·gipa me·chik bi·sani manggisiko uni nok sambao uni gitokko rageka gnang songni manderang nikahachim. Ia me·chikni manggisiko ja·mano post mortem ka·on, uko so·otna skang drae til·ekaha ine ma·sina man·ahachim.
Ia bi·sara ia nokdangni saksakamkam me·chik bi·sa ong·achim ine kobor on·aha.
Ia a·selni bidingo police-rang ja·mano, ia me·chik bi·sani noksul, Chanda M Sangma minggipa mandeko rim·aha maina ua, ia bi·sani manggisiko nikchengaonin nokoni kate dongahachim.
Koborko on·ani gitade, ia dos dakgipa mandeara batanggimin changoba apsan daken me·chikko drae til·ekahachim aro da·o ua ia case-na jamin ra·e dongengachim.
Ia a·sel ong·aniko NGO-rang raken jegalatengon, “Iandake me·chik bi·sako drae til·ekenba so·ote galaniara chinga pilaknan jagokmanpilaniko aro an·sikitaniko ra·baaha. Ia mandeni kam namen ka·saninggija ong·aha aro una rakbatsranggipa sastiko on·na nanga. Chinga iandake kalimani somoio me·chik bi·sani nokdang baksa ong·enga,” ine GSU Chibinang unit-ni president Hamit Marak parakataha.
