SHILLONG: Meghalaya a·dokni namroro silroroanina aro poraienggipa chatro chatrirangni namgnina a·songni gital National Education Policy (NEP) 2020-ko a·doko ra·gatna nangchongmotenga ine Sonibar salo, United Democratic Party (UDP)-ni general secretary Jemino Mawthoh parakataha.
“An·chingni Meghalaya a·dokba ja·manchake dongna nangjawa aro NEP-ko ra·gatna nangtelenga. NEP-ko ra·gatanichisa an·chingni a·dokba re·mikkangna man·gen,” ine Mawthoh parakataha.
Gital niamrangko ra·gatengon pangnan neng·nikanirangde dongaigen ine janapatengon, NEHU-ni Vice Chancellor Prabha Shankar Shukla-ni agana gita, NEP-ko ra·gatanio pilak dolrangan ku·cholsan ong·na nanga ine UDP-ni general secretary parakataha.
“Neng·nikani aro ra·bianirangde dongaigen indiba an·ching ja·manchake dongna man·skajawa. NEP-ko ra·gattelna nangenga indiba neng·nikanirang dongenga ong·ode, uandakgipa neng·nikanirangko namatna gita apsan chanchirimna nanga,” ine Mawthoh aganaha.
Mawthoh-ni parakatani gitade, ia gital NEP-ara chatro chatrirangni namgninan ong·engani gimin a·dokoba NEP 2020-ko ra·gatna nangchongmotenga aro ia NEP-ko da·on ra·gatjagenchimode a·dokni chatro chatrirang ja·manchakskanaba gnangchim.
Meghalaya a·doko National Education Policy (NEP) 2020-ko ra·gatanio meligrikgijanirangko namatna man·kujaengon, ia gital NEP 2020-ko chatro chatrirangni namgnina ia 2023-2024 academic session-onin ra·gatna gita university, college, chatro chatrirang aro a·dok sorkario kam ka·enggipa pilak manderangkon ku·cholsan ong·e bakrimchina gita North Eastern Hill University (NEHU)-ni Vice Chancellor Prabha Shankar Shukla didiatahachim ine nikna man·a.
