BAGHMARA: South Garo Hills a·jani Rongchekgre Rural Haat-ko Bristibar salo, South Garo Hills a·jani Deputy Commissioner S Awasthi kulie on·angaha aro ia Rural Haat-ko kulianio, DRDA-ni Project Director PR Marak, Baghmara-ni BDO JN Sangma, South Garo Hills NABARD-ni DDM Khelchandra Chongtham aro gipin officer-rangba dongpae bak ra·angaha.
Ia gital Rural Haat-ko rikna gita NABARD, MGNREGA baksa tangka paisarangko dakchake on·aha aro iako Baghmara-ni Meghalaya State Rural Livelihood Society (MSRLS) jako ra·aha.
Ia Rongchekgre Rural Haat-ko kulie on·angani somoio South Garo Hills a·jani Deputy Commissioner, jinmana aganprakangengon, Rural Haat-ko kulianichi mai dakgipa namgnirangko man·gen, uarangni gimin talataniko on·angenba, ia Rural Haat-ko kulina gita kam ka·gipa pilakkon mittelpilangaha.
Ia Rural Haat-ko namdapatna gita cholrangko sanchina gitaba Awasthi, South Garo Hills a·jani MSRLS-ko didiangaha.
Ia Rural Haat-ko rongtal an·tale rakkichina aro jabolrangko skatang galgija, dongimin biapo galchina gitaba ua songni manderangko didiangaha.
Ia Rural Haat-ko kulianio, NABARD-ni DDM Khelchandra Chongtham-ba jinmana aganprakengon, ian songni manderangna an·tangtangni bosturangko palbadingna cholrangko on·na gita kuligipa Rural Haat ong·a ine parakangaha.
Ia Rural Haat-ko rikna gita an·tangni a·arangko on·ahani gimin ua dingtangmancha a·a nokgipa Pentila D Sangma-koba mittelpilangaha.
