U·IATTIMGIPAONI
TURA: Re·anggipa Budbar walo, West Garo Hills a·jani Garobadha jolo bol cha·ugipa manderangko songni manderang champengsoani ja·man, bol cha·ugipa manderang, ua biaponi sale kataha ine kobor on·aha.
Koborko on·ani gitade, Budbar walo ratdaldal bolrangko AS-17C 0618 pik up truck gario salangmitingko Megonggre songni manderang nikenba gariko champengsoe, bol salani lekkarangko mesokchina aganon, gariko saltimgipa, lekkarangko mesokna man·jae, rang·san ua biaponi gariko sale kataha.
Ia manderang, bolrangko cha·ue sale katahani gimin songni manderangba motorcycle-rango ia gariko rikahachim indiba ia gari, Garobadha-Rajabala rama gita Assam-chipakna sale katangna man·aha ine koborko on·aha.
Garo Hills-ni bol wa·arangko iandake walni somoirango cha·ue Assam aro gipin biaprangona salangna man·engani giminba songni manderang, Forest aro Police department-ni kamna suk ong·gijaniko parakattokaha.
